Grenivíkurskóli
Grenivíkurskóli er grunnskóli á Grenivík í Grýtubakkahreppi. Þar eru um 50 nemendur. Skólinn á rætur allt frá árinu 1892 en núverandi skólahúsnæði er frá árinu 1981.
Stærð breyta
Árið 2021 voru 48 nemendur í 1.—10. bekk við Grenivíkurskóla. Það ár voru 12,6 stöðugildi starfsmanna við skólann. Þar af voru um 10,4 stöðugildi kennarar.[1]
Saga breyta
Rætur Grenivíkurskóla liggja allt til ársins 1892 en þá var farskóli starfandi í Grýtubakkahreppi. Skólahald var í „Gamla skólanum“ á Grenivík sem byggður var 1925, allt til ársins 1981 en þá var núverandi húsnæði tekið í notkun.[2] Árið 1991 var byggð sundlaug við skólann og árið 1994 reis nýtt íþróttahús.[3][4][5] Árið 2005 var síðan fimmhundruð fermetrar íþróttamiðstöð byggð við skólann.[6] Á árunum 1972–1984 sóttu elstu grunnskólanemar Grýtubakkahrepps nám í Stórutjarnarskóla í Ljósavatnsskarði, Þingeyjarsveit. Síðustu ár hefur nemendafjöldinn verið um 50 en um miðjan 9. áratuginn voru nemendur flestir eða um 100.[7]
Staðsetning breyta
Grenivíkurskóli er staðsettur við Túngötu 3, á Grenivík í Grýtubakkahreppi.
Stjórnun breyta
Skólastjóri Grenivíkurskóla (2023) er Þorgeir Rúnar Finnsson. Inga María Sigurbjörnsdóttir kennari er staðgengill skólastjóra.[8]
Nám og kennsla breyta
Grenivíkurskóli sem býður nám í 1.—10. bekk, er skóli án aðgreiningar. Einstaklingsnámskrár eru gerðar fyrir nemendur með sérþarfir í námi og þeir fá gögn og hjálpartæki til að þeir geti stundað sitt nám.[7]
Á vef skólans er nám og kennsla sagt skipulagt með hliðsjón af grunnþáttum menntunar sem eru læsi á samfélag, menningu, umhverfi og náttúru. Þannig læri börn og ungmenni að byggja sig upp andlega og líkamlega, og bjarga sér í samfélaginu og vinna með öðrum. Áhersla er lögð á heilbrigði og velferð sem byggi bæði á líkamlegum og andlegum þáttum. Skólinn hefur innleitt Olweusaráætlun gegn einelti.[9]
Í ytra mati Menntamálastofnunar á Grenivíkurskóla frá árinu 2016 er þess sérstaklega getið að árangur nemenda hafi farið vaxandi og verið yfir landsmeðaltali.[7]
Skólabragur og hefðir breyta
Í ytra mati Menntamálastofnunar á Grenivíkurskóla eru jákvæð samskipti og gagnkvæm virðing sögð einkenna skólastarfið. Skólinn stefni að efldri sjálfsvitund, auknu sjálfstrausti og jákvæðari sjálfsmynd nemenda. Niðurstöður kannana meðal nemenda segja góðan skóla- og bekkjaranda ríkja. Bekkjarfundir eða gæðahringir séu haldnir vikulega. Rýnihópur nemenda segir þeim líði vel í skólanum, allir séu vinir og allir þekki alla. Nemendur segja lýðræði í skólanum og að allir séu jafnir. Fulltrúar nemenda í stjórn nemendafélagsins eru kosnir lýðræðislegri kosningu.[7]
Að mati kennara í rýnihópi liggur styrkur skólans í samheldni og jákvæðni, gleði og hjálpsemi. Foreldrar í rýnihóp segja skólastjóra leggja sig fram um að hafa góðan skólabrag.[7]
Einkunnarorð skólans eru: Hugur, hönd og heimabyggð.[10]
Tenglar breyta
Tilvísanir breyta
- ↑ „Rekstur leik- og grunnskóla“. Samband íslenskra sveitarfélaga. Sótt 8. ágúst 2023.
- ↑ „Dagur - 222. tölublað - HelgarDagur (20.11.1993) - Tímarit.is“. timarit.is. Sótt 10. ágúst 2023.
- ↑ „Sveitarstjórnarmál - 1. tölublað (01.02.1991) - Tímarit.is“. timarit.is. Sótt 10. ágúst 2023.
- ↑ „Dagur - 151. tölublað - HelgarDagur (13.08.1994) - Tímarit.is“. timarit.is. Sótt 10. ágúst 2023.
- ↑ „Almanak Hins íslenska þjóðvinafélags - 1. tölublað (01.01.1996) - Tímarit.is“. timarit.is. Sótt 10. ágúst 2023.
- ↑ „Fréttablaðið - 317. tölublað (23.11.2005) - Tímarit.is“. timarit.is. Sótt 10. ágúst 2023.
- ↑ 7,0 7,1 7,2 7,3 7,4 Hanna Hjartardóttir og Birna Sigurjónsdóttir (2016). „Menntamálastofnun: Ytra mat grunnskóla: Grenivíkurskóli Ytra mat 2016“ (PDF). Ytra mat unnið á vegum Menntamálastofnunar fyrir mennta- og menningarmálaráðuneytið og Grýtubakkahrepp. Sótt 9. ágúst 2023.
- ↑ Grenivíkurskóli. „Starfsmenn“. Grenivíkurskóli. Sótt 10. ágúst 2023.
- ↑ Grenivíkurskóli. „Grunnþættir menntunar“. Grenivíkurskóli. Sótt 10. ágúst 2023.
- ↑ Grenivík. „Grunnskóli“. Grenivík. Sótt 10. ágúst 2023.