Flugslysið á Hvammsfirði

Flugslysið á Hvammsfirði var flugslys sem varð 13. mars 1947 er Grumman JRF-6B flugbátur Loftleiða, TF-RVI, með átta manns innaborðs, hlekktist á í flugtaki á Hvammsfirði þar sem vélin var að hefja sig á loft frá Búðardal með þeim afleiðingum að fjórir fórust.

Grumman flugbátur, sömu tegundar og fórst.

Slysið

Flugbáturinn var á leið til Reykjavíkur eftir að hafa sótt farþega á Ísafirði og Djúpuvík. Illa gekk að koma vélinni á loft og tókst ekki fyrr en í þriðju tilraun. Komst vélin í um 30 metra hæð, en tók þá snarpa vinstri beygju og féll í sjóinn á vinstri væng og nef og hvolfdi um leið og hún kom í sjóinn. Þrír komust út af sjálfsdáðum og náðu tveimur til viðbótar úr vélinni en þrír af farþegunum komust aldrei út. Róðrarbátur sem hafði flutt fimm farþega frá Búðardal í vélina kom þeim til bjargar og flutti í land. Einn farþeginn komst aldrei til meðvitundar og lést skömmu seinna. Við komuna í land fóru aðrir menn strax út í ferjubátinn og ætluðu að freista þess að ná þeim sem fastir voru í flugvélinni. Þeir voru ekki komnir nema skammt frá landi þegar flugvélarflakið sökk.

Þremur dögum síðar tókst að ná flugvélinni úr sjónum og líkunum þremur sem í henni voru. Við aðgerðina brotnaði vélin í tvennt.

Í skýrslu skoðunarmanns flugvéla kom fram að talið var að annað tveggja hefði valdið slysinu, vélarbilun eða ofris.