Ásgeir Sigurðsson (snikkari)
Ásgeir Sigurðsson (eða Ásgeir snikkari) (1650 - eftir 1712) var hreppstjóri og lögréttumaður á Ósi, Staðarhreppi, Strandasýslu, 1703 og einnig 1704. Í Blöndu er hann sagður „víðförlastur [..] allra íslenzkra sveitabænda á 17. öld, að Jóni Indíafara undanskildum“. Í Jarðabók Árna og Páls sem skráð var í Mosfellshreppi í Kjós í júní 1704 var Ásgeir sagður ‘snitkari’ og búandi á Ósi en Ásgeir var þá eigandi hluta af jörðinni Norður-Reykjum í Mosfellssveit.
Ásgeir var fæddur í Rauðsdal á Barðaströnd um 1650. Hann var kominn af Magnúsi prúða Jónssyni, sýslumanni í Ögri og síðari konu hans, Ragnheiði Eggertsdóttur lögmanns, Hannessonar. Þegar hann var 18 ára að aldri fór hann utan til trésmiðanáms í Kaupmannahöfn og hélt hann dagbækur um ferð sína um meginland Evrópu og hafa hlutar hennar verið prentaðar og segir þar af ævintýrum hans sem iðnsveins. Kona Ásgeirs var Helga Árnadóttir, frá Ósi, og eignuðust þau tvær dætur, Hallbjörgu og Steinunni, sem fjölmennar ættir eru frá komnar. Dóttir Hallbjargar og manns hennar, Jóns Hannessonar í Reykjarfirði í Vatnsfjarðarsveit, var Anna, móðir Ásgeirs Þorsteinssonar á Rauðamýri í Nauteyrarhreppi, en sonarsonur hans var Ásgeir skipherra og kaupmaður, er stofnaði Ásgeirsverslun á Ísafirði.
