Víkingur Heiðar Ólafsson

Víkingur Heiðar Ólafsson (fæddur 14. febrúar 1984) er íslenskur píanóleikari.

Víkingur (2013).

Víkingur hefur leikið á tónleikum víða í Evrópu, Asíu, Bandaríkjunum og Kanada og komið fram sem einleikari með hljómsveitum á borð við Philharmonia Orchestra í Lundúnum, Hljómsveit Danska ríkisútvarpsins, Fílharmóníusveitina í Turku í Finnlandi og BBC-sinfóníuhljómsveitina í Ulster. Víkingur hefur hlotið fjölda viðurkenninga fyrir píanóleik sinn og tónlistarstarf, meðal annars Íslensku bjartsýnisverðlaunin 2009 og Íslensku tónlistarverðlaunin átta sinnum. Árið 2014 gekk Víkingur til liðs við alþjóðlegu umboðsskrifstofuna Harrison Parrott, árið 2016 skrifaði hann undir útgáfusamning hjá þýsku hljómplötuútgáfunni Deutsche Grammophon, og gaf skömmu síðar út sína fyrstu hljómplötu undir merkjum hennar.

Opnunartónleikar Hörpu

Víkingur lék píanókonsert Edvards Griegs með Sinfóníuhljómsveit Íslands undir stjórn Vladímírs Ashkenazy á opnunartónleikum tónlistarhússins Hörpu í Reykjavík 2011. Víkingur hefur síðan komið fram með Ashkenazy á tónleikum í Kaupmannahöfn og Birmingham.

Flutningur á nýrri tónlist

Víkingur hefur frumflutt fjóra íslenska píanókonserta, eftir Daníel Bjarnason, Hauk Tómasson, Snorra Sigfús Birgisson og Þórð Magnússon. Meðal erlendra tónskálda sem Víkingur hefur starfað með er bandaríska tónskáldið Philip Glass, en Víkingur hefur leikið píanóetýður hans með honum á tónleikum í Reykjavík, Gautaborg og Lundúnum. Víkingur hefur einnig starfað með enska tónskáldinu Mark Simpson.

Útgáfa

Síðla árs 2016 var tilkynnt um að Víkingur hefði undirritað útgáfusamning við þýsku tónlistarútgáfuna Deutsche Grammophon. Fyrsti hljómdiskur hans hjá útgáfunni kom út í janúar 2017, en diskurinn var helgaður píanóverkum bandaríska tónskáldsins Philips Glass og gefinn út í tilefni af áttræðisafmæli hans. Diskurinn hlaut einróma lof gagnrýnenda og var m.a. valinn með bestu klassísku hljómdiskum ársins 2017 á vef NPR, Gramophone og New York Times.

Árið 2010 stofnaði Víkingur útgáfufyrirtækið Dirrindí, og hefur hann gefið út þrjá hljómdiska undir merkjum þess. Árið 2010 kom út diskurinn Debut með verkum Beethovens og Brahms, og árið 2011 diskurinn Chopin – Bach, með prelúdíum Chopins og partítum Bachs. Árið 2012 kom út diskurinn Winterreise, þar sem Kristinn Sigmundsson syngur Vetrarferðina eftir Schubert við meðleik Víkings. Diskurinn hlaut Íslensku tónlistarverðlaunin sem tónlistarupptaka ársins 2012 á sviði sígildrar- og samtímatónlistar.

Tónlistarhátíðir

Víkingur er stofnandi og listrænn stjórnandi tónlistarhátíðarinnar Reykjavík Midsummer Music, sem haldin hefur verið árlega í Hörpu síðan 2012. Hátíðin hlaut tvenn verðlaun á Íslensku tónlistarverðlaununum 2012, sem tónlistarviðburður ársins í sígildri- og samtímatónlist, og Rogastans, nýsköpunarverðlaun Íslensku tónlistarverðlaunanna. Víkingur er einnig listrænn stjórnandi sænsku tónlistarhátíðarinnar Vinterfest, en Víkingur tók við því starfi af klarinettuleikaranum Martin Fröst 2015.

Sjónvarp og útvarp

Víkingur vann að tónlistarþáttunum Útúrdúr, ásamt Höllu Oddnýju Magnúsdóttur og Viðari Víkingssyni, sem sýndir voru á RÚV 2013-14 og 2014-15, og tilnefndir voru til Edduverðlauna 2015. Þáttunum var afar vel tekið af gagnrýnendum. Víkingur hefur einnig gert útvarpsþætti fyrir Rás 1.

Samstarf með myndlistarmönnum

Árið 2014 var Víkingur hluti af gjörningi svissneska lisamannsins Romans Signers á Transart-hátíðinni í Bolzano í ítölsku ölpunum. Víkingur lék þar tónverkið Vers la Flamme eftir Alexander Scriabin á fljótandi sviði úti á Vernago-vatni, en flutningurinn truflaður af þyrlu sem sveimaði yfir honum. Auk Signers hefur Víkingur starfað með videólistamönnunum Yann Malka og Lillevan.

Nám

Víkingur lauk bachelors- og meistaranámi frá Juilliard-skólanum í New York, þaðan sem hann útskrifaðist 2008. Aðalkennarar hans við skólann voru Jerome Lowenthal og Robert McDonald. Einnig sótti Víkingur píanótíma til Ann Schein. Víkingur lauk einleikaraprófi frá Tónlistarskólanum í Reykjavík 2001 undir handleiðslu Peters Maté, en áður lærði Víkingur hjá Erlu Stefánsdóttur.

Tengill

• Vefsetur Víkings Heiðars Ólafssonar