Hreppstjórainstrúxið
Hreppstjórainstrúxið var erindisbréf eða reglugerð handa hreppstjórum sem Magnús Stephensen samdi og gaf út á Leirárgörðum 24. nóvember 1809 samkvæmt konungsúrskurði 21. júlí 1808.[1] Með hreppstjórainstrúxinu var forn sjálfstjórn hreppa á Íslandi að fullu afnumin og hreppstjórar orðnir ríkisstarfsmenn skipaðir af amtmönnum samkvæmt tilnefningu sýslumanna.[2] Sjálfstjórn hreppa komst aftur á með tilskipun um sveitarstjórn á Íslandi 4. maí 1872.
Titill instrúxins í frumútgáfu þess var: „Instrúx fyrir hreppstjórnarmenn á íslandi. Eptir konúnglegri allranáðugustu skipun þann 21. Julii 1808 samið, og hlutaðeigendum til eptirbreytni útgefið þann 24. Novembr. 1809 af íslands amta-yfirvöldum. Prentað á opinberan kostnað að Leirárgörðum 1810.“
