Framhaldsskólinn í Vestmannaeyjum
Framhaldsskólinn í Vestmannaeyjum er framhaldsskóli sem tók formlega til starfa í Vestmannaeyjum haustið 1979 við samruna Vélskólans í Vestmannaeyjum, Iðnskólans í Vestmannaeyjum og framhaldsdeilda Gagnfræðaskólans í Vestmannaeyjum (5. og 6. bekk). Upphaf hans má rekja til þess að haustið 1977 var ákveðið að kennan saman kjarnagreinarnar íslensku, ensku, dönsku og stærðfræði fyrir framhaldsdeildir Gagnfræðaskólans, Iðnskólans og Vélskólans. Um vorið 1977 útskrifaðist tvöfaldur árgangur úr Gagnfræðaskólanum því þá voru í fyrsta skipti haldin samræmd próf í 9. bekk ásamt því að nemendur luku landsprófi og gagnfræðaprófi. Í upphafi árs 1997 tók svo Framhaldsskólinn yfir rekstur Stýrimannaskólans í Vestmannaeyjum.
Í upphafi heyrðu elstu bekkir grunnskólans undir Framhaldsskólann. Var þá sami skólameistari yfir Framhaldsskólanum og Gagnfræðaskólanum og sumir kennarar kenndu á báðum skólastigunum.
Nemendafjöldi fyrsta árið var 85 nemendur. Þeim fjölgaði fram til ársins 1997 að nemendafjöldi náði 300. Það hefur nokkuð haldist í stað síðan, með sveiflur niður í um 250 nemendur.
Við Framhaldsskólann starfa tvö öflug nemendafélög, Nemendafélag Framhaldsskólans í Vestmannaeyjum, skammstafað NFFÍV og Kaffisjóður Vélstjórnarbrautar.
Byggingin sem Framhaldsskólinn í Vestmannaeyjum er í var upprunalega byggð fyrir Gagnfræðaskólann í Vestmannaeyjum. Þeir sem ákváðu staðsetningu Gagnfræðaskólans, Þorseinn Víglundsson, skólastjóri hans, og Páll Zoëga læknir, voru svo framsýnir að tryggja honum nægt landrými þannig að hægt var að byggja við húsið þá viðbót sem framhaldsskólinn þurfti til að geta sinnt fjölbreyttri kennslu.