Bryndís Benediktsdóttir

Bryndís Benediktsdóttir (f. 1951) er prófessor emeritus við Læknadeild Háskóla Íslands.

Bryndís Benediktsdóttir
Fædd	1951
Störf	Prófessor emeritus við Læknadeild Háskóla Íslands

Ferill

Bryndís lauk stúdentsprófi frá Menntaskólanum í Reykjavík 1971 og hóf það ár nám í læknisfræði við Háskóla Íslands. Hún lauk kandidatsprófi þaðan 1977 og stundaði framhaldsnám í heimilislækningum og lyflækningum á árunum 1979 til 1987 í Uppsölum í Svíþjóð. Hlaut sérfræðiréttindi í heimilislækningum í Svíþjóð 1984, á Íslandi 1987 og evrópsk sérfræðiréttindi í Sleep Medicine 2009.

Í júní 1987 hóf Bryndís störf sem sérfræðingur í heimilislækningum við Heilsugæsluna í Garðabæ og starfaði þar til ársins 2019.

Bryndís var ein af stofnendum Hins íslenska svefnrannsóknarfélags árið 1988. Á árunum 1997 til 1999 vann hún á svefnrannsóknarstofu geðdeildar, Landspítalanum við Hringbraut. Ráðgefandi sérfræðingur við Scan-Sleep svefnrannsóknarstofnun í Kaupmannahöfn á árunum 2002-12. Frá árinu 2004 til dagsins í dag hefur Bryndís starfað við svefnrannsóknir á svefndeild Landspítala í Fossvogi. Bryndís hóf störf við læknadeild Háskóla Íslands sem stundakennari 1987, fastráðin frá árinu 1991 fyrst sem lektor, dósent 2005 og skipuð prófessor árið 2013.

Hún tók þátt í að innleiða, móta og efla kennslu í samskiptum læknis og sjúklings við Læknadeild HÍ, en það hafði ekki verið þáttur í námi læknanema þegar hún hóf störf. Mótunarferlið var unnið í samstarfi við læknaskóla á Norðurlöndum, Bandaríkjunum og víðar. Hún byggði upp kennsluna sem hefur fengið vaxandi vægi og hlutdeild í læknanáminu. Námið felur í sér að kenna og þjálfa samskipti læknis og sjúklings, siðfræði, sálfræði og lög sem lúta að læknisstarfinu. Lögð er áhersla á fagmennsku, mannvirðingu og manngæsku í starfi læknis og að gengið sé út frá sjónarhorni sjúklings við að leysa vanda hans, í stað þess að einblína einöngu á sjúkdómsgreiningar. Samstarf við hugvísindasvið HÍ var komið á (Íslensku- og menningardeild) og fagurbókmenntir notaðar við kennslu til að efla skilning og samlíðan í samskiptum læknis og sjúklings og siðfræðikennsla efld til mikilla muna.

Ýmis störf og verkefni

Á starfsárum sínum gegndi Bryndís trúnaðarstörfum á vegum Háskóla Íslands. Hún sat í deildarráði læknadeildar á árunum 2004-09 og seinna sem varamaður. Á árunum 1998 -2005 var hún fulltrúi HÍ í Nordic Network for Education in Medical Communication og formaður ráðsins 2003. Formaður jafnréttisnefndar læknadeildar 2006-09, í jafnréttisnefnd Heilbrigðisvísindasviðs 2009-12 og í stjórn Rannóknastofu í kvenna - og kynjafræðum, RIKK 2009-10. Hún var fulltrúi HÍ í nefnd um tæknifrjóvgun skipuð af heilbrigðisráðneyti og í stöðunefnd lækna á vegum heilbrigðisráðuneytis frá árinu 2005.

Bryndís sat í ritstjórn Læknablaðsins 2007-11 og The Scandinavian Journal of Primary Health care 1994-2005.

Rannsóknir

Bryndís hefur verið afkastamikill vísindamaður og hafa rannsóknir hennar beinst fyrst og fremst að svefni og svefnsjúkdómum, en einnig áhrifum erfða og umhverfis á heilsu. Stór hluti þeirra hafa verið unnar í alþjóðlegri samvinnu, einkum við rannsakendur á Norðurlöndum og við PENN háskólann, Philadelphiu, BNA. Hún hefur verið rannsakandi og verkefnisstjóri í fjölþjóðlegum rannsóknarverkefnunum: BOLD, SAGIC, RHINE, RHINESSA og ECRHS. Niðurstöður rannsókna hennar hafa verið birtar í virtum erlendum ritrýndum læknatímaritum, en einnig í Læknablaðinu. Hún hefur haldið fjölda fyrirlestra og birt veggspjöld á alþjóðlegum og innlendum ráðstefnum.

Viðurkenningar

Hún hefur hlotið verðlaun fyrir rannsóknir á svefni. Hún hlaut Astra award for sleep research in Primary care árið 2000 og The Wayne Hening Investor Award á veitt af American Academy of Sleep Medicine and Sleep Research Society 2012.

Einkalíf

Bryndís er gift Þórarni Gíslasyni prófessor og yfirlækni og eiga þau fjögur börn.