Borgarastyrjöldin í Búrúndí
Borgarastyrjöldin í Búrúndí var borgarastyrjöld í Búrúndí og Austur-Kongó sem stóð frá 1993 til 2006. Borgarastyrjöldin var afleiðing af langvinnum átökum þjóðarbrota tútsa og hútúa og hófst þegar fyrsti lýðræðislega kjörni forseti Búrúndí, Melchior Ndadaye, var myrtur af öfgamönnum úr hópi tútsa. Um langt skeið hafði herinn verið aðallega skipaður tútsum en hútúar verið í meirihluta í landinu. Talið er að um 100.000 hafi verið drepin í átökunum sem fylgdu í kjölfarið. Þann 6. apríl 1994 lést eftirmaður Ndadayes, Cyprien Ntaryamira, ásamt forseta Rúanda, Juvénal Habyarimana, þegar þota þeirra var skotin niður í Kigali með flugskeyti. Atvikið varð til þess að þjóðarmorðið í Rúanda hófst og hundruð þúsunda flóttamanna þaðan flykktust yfir landamærin. Árið 1996 framdi herforinginn Pierre Buyoya valdarán og hóf friðarviðræður en helstu skæruliðahreyfingar hútúa neituðu að skrifa undir friðarsamkomulag. Árið 2003 tók hútúinn Domitien Ndayizeye við forsetaembættinu og gerði friðarsamkomulag sem fól í sér að skæruliðahreyfingar hútúa yrðu hluti af her landsins. Þann 15. apríl 2006 var 12 ára útgöngubanni aflétt sem markar endalok styrjaldarinnar. Talið er að um 300.000 manns hafi týnt lífi.
