Allt um Lukku Láka

Allt um Lukku Láka (franska: 7 Histoires de Lucky Luke) eftir Morris (Maurice de Bevere) og René Goscinny er 42. bókin í bókaflokknum um Lukku Láka. Bókin kom út árið 1974, en sögurnar sem hún hefur að geyma birtust fyrst í teiknimyndablaðinu Lucky Luke sem kom út mánaðarlega á sama ári.

Kápa dönsku útgáfu bókarinnar.

Söguþráður

Eins og heiti bókarinnar á frummálinu gefur til kynna hefur hún að geyma sjö styttri sögur um Lukku Láka sem allar birtust upphaflega í hinu skammlífa tímariti Lucky Luke árið 1974. Sögurnar eru eftirfarandi:

1. Westræn gestrisni (f. L'Hospitalité de l'Ouest) þar sem Lukku Láki þarf að glíma við nágrannaríg í veislu á bóndabæ.
2. Undanvillingarnir (f. Maverick) sem fjallar um hatrammar deilur um strokukálf.
3. Sannleikurinn um Vætu-Erp (f. L'Égal de Wyatt Earp) sem segir frá kynnum Lukku Láka af einni af hetjum Villta Vestursins, skerfaranum Wyatt Earp (1848-1929).
4. Spekúlant (f. Le Colporteur) þar sem Lukku Láki kemur klókum farandsölumanni til aðstoðar.
5. Botnleysa (f. Passage dangereux) sem lýsir tilraunum Lukku láka til að aðstoða landnámshjón við að komast yfir straumharða á.
6. Sónata í bang-moll (f. Sonate en Colt majeur) þar sem Lukku Láki fylgir píanóleikara með sviðsskrekk til Houston að troða upp í tónleikahöll.
7. Litli bófinn með barnatennurnar (f. Un desperado à la dent de lait) sem fjallar um ferð Lukku Láka með óknyttastrák til tannlæknis.

Íslensk útgáfa

Allt um Lukku Láka var gefin út af Fjölva árið 1978 í íslenskri þýðingu Þorsteins Thorarensen. Þetta er 16. bókin í íslensku ritröðinni. Íslenska útgáfan kom út í samstarfi við önnur Norðurlönd og er að ýmsu leyti frábrugðin upprunalegu útgáfunni. Þannig er í íslensku útgáfunni að finna grein um sögu bókaflokksins - Ævintýrið um Morris, Goscinny og Lukku Láka - eftir Freddy Milton og Henning Kure og yfirlit yfir Lukku Láka sögurnar í réttri tímaröð. Þá er stutt grein í bókinni sem ber heitið "Þegar aðrir teikna Lukku Láka" þar sem Morris og Jean Giraud, höfundur bóka um Blástakk, stæla teikningar hvors annars og skopmyndateiknarinn Marcel Gotlib teiknar sína spagettíútgáfu af Lukku Láka. Loks er að finna stutta aukasögu um Daldónana í íslensku (norrænu) útgáfunni, Hringrás lífsins (f. Les Chemins du crépuscule) sem birtist upprunalega í teiknimyndablaðinu Sval.