Alþjóða Samfrímúrarareglan

Alþjóða samfrímúrarareglan, LE DROIT HUMAIN hefur starfað á Íslandi frá 1921. Í henni starfa saman að mannrækt til heilla mannkyni, fólk, óháð kyni, þjóðerni, litarhætti og trúarskoðunum. Hún kallar eftir frelsi, jafnrétti og bræðralagi en það eru jafnframt hin þreföldu einkunnarorð hennar. Hún starfar um allt land og er með stúkur í Reykjavík, Akureyri, Egilstöðum og á Selfossi.

Le Droit Humain er alþjóðleg regla með höfuðstöðvar sínar í París og er Íslandssambandið hluti hennar. Reglan veitir viðtöku öllum sem eru 18 ára og eldri. Siðakerfi reglunnar er Hið Forna og Viðurkennda Skoska Siðakerfi og telur það 33 stig. Fólk skuldbindur sig til að vera í reglunni sem virkir meðlimir í þrjú ár. Eftir það getur fólk sagt sig úr henni en þagnarskylda um starf innan hennar gildir hins vegar ævilangt. Ekki til þess að leyna einhverju sem ekki þolir dagsljós heldur til þess að varðveita þá upplifun og þau áhrif sem hver og einn verður fyrir í starfi hennar.

Auk Alþjóða Samfrímúrarareglunnar starfar á Íslandi Frímúrarareglan á Íslandi. Hún er íslensk regla er skiptist á viðurkenningu við reglur í öðrum löndum. Hún veitir einungis viðtöku kristnum karlmönnum, 25 ára og eldri. Siðakerfið er hið svokallaða sænska siðakerfi er telur 11 stig.

Að framan er getið um frímúrarareglur sem einungis veita karlmönnum viðtöku. Sú hefð komin frá miðöldum er karlar litu á konur sem sér óæðri. Hins vegar er vitað að karlar og konur störfuðu saman í launhelgum fornaldar.

Miðaldahefðin var ekki rofin fyrr en á ofan verðri 19 öld með tilkomu Alþjóða Sam-Frímúrarareglunnar Le Droit Humain. Stofnendur töldu nauðsynlegt að skila starfi frímúrara til nútímans í samræmi við breytt þjóðfélagsviðhorf og jafnréttishugsjón.

Uppruna þessarar reglu má rekja til frímúrarastúkunnar Les Libres Penseurs (Frjálsir hugsuðir) í Pecq í Frakklandi. Hún starfaði í umboði “La Grande Loge Symbolique Ecossaise” og var mynduð af bræðrum er áður tilheyrðu “Grand Orient de France“. Meðlimir þessarar stúku höfðu kynnst Maríu Deraismes (1828-1894) sem var í forystu kvenréttindahreyfingarinnar frönsku og óþreytandi að hvetja konur til starfa á sem flestum sviðum. Hún var rithöfundur og blaðamaður og nýtur mikillar virðingar í franskri sögu. Þannig hefur verið reist stytta af henni í París og ein gata þeirrar borgar er heitin eftir henni. Bræður áður greindrar stúku töldu sig ekki geta fundið neitt sem mælti gegn því að kona yrði frímúrari nema vanhugsaða venju og þar af leiðandi vígðu þeir hana árið 1882. Marie Deraismes beitti sér svo fyrir því ásamt stjórnmálamanninum dr. Georges Martin (1844-1916) að stofnuð var Alþjóðleg frímúrararegla karla og kvenna Le Droit Humain, sem stórstúka í París 1893.

Stofnendur voru 18 og þar á meðal má nefna Clemence Royer (1830-1902), sem einnig var í forystu frönsku kvenréttindahreyfingarinnar. Hún vann að vísindastörfum, var fræðibókahöfundur og þýddi t.d. bók Darwins um uppruna tegundanna. Hún var fyrsta konan sem sæmd var heiðursmerki “Légion d’Honneur” 1900. 1899 var Hið Háa Ráð (Supreme Council) stofnsett sem yfirstjórn reglunnar