Opna aðalvalmynd
Þórshöfn við Þistilfjörð

Þistilfjörður er fjörður á Norðausturlandi, sem gengur inn austan við Melrakkasléttu en norðan við Langanes. Inn af firðinum er samnefnd sveit, láglend og grösug með grunnum dölum og lágum hæðum á milli. Þar eru allmargir bæir og fleiri bæir voru áður í heiðalöndunum inn af firðinum.

Þistilfjörður er í Norður-Þingeyjarsýslu og er sérstakt sveitarfélag, Svalbarðshreppur, sem dregur nafn af kirkjustaðnum Svalbarði, gömlu stórbýli. Þar er nú skóli sveitarfélagsins. Fjörðurinn er hins vegar sagður kenndur við landnámsmanninn Ketil þistil. Þistilfjörður er rótgróið sauðfjárræktarsvæði og á Gunnarsstöðum í Þistilfirði er eitt af stærri sauðfjárbúum landsins. Þaðan er Steingrímur J. Sigfússon fyrrverandi fjármálaráðherra.

Nokkrar ár renna um Þistilfjörð og stærstar eru Svalbarðsá, Sandá, Hölkná og Hafralónsá. Þær eru nokkuð vatnsmiklar og straumharðar. Lax- og silungsveiði er í þeim flestum. Reki er hlunnindi á mörgum jörðum í hreppnum og dúntekja einnig.

Um miðjan júlí árið 2019 keypti breski auðkýfingurinn James Ratcliffe jörðina Brúarland 2 í Þistilfirði. Henni fylgja meðal annars veiðiréttindi í Hafralónsá, sem er vinsæl á meðal veiðimanna.[1]

TilvísanirBreyta

  1. bjarnir (15. júlí 2019). „Ratcliff kaupir Brúarland 2 í Þistilfirði“. RÚV (enska). Sótt 15. júlí 2019.