Þórir Baldvinsson
Þórir Grani Baldvinsson (20. nóvember 1901 á Granastöðum í Ljósavatnshreppi – 3. október 1986) var íslenskur arkitekt.
Þórir lauk gagnfræðaprófi á Akureyri 1922 og stundaði nám við MR. Hann dvaldi í Bandaríkjunum frá 1923 til 1930. Nam við San Francisco Polytechnic Highschool í Bandaríkjunum 1923-25 og í arkitektúr við University of California Extension School of Architecture 1924-26.
Þórir starfaði sem forstöðumaður hjá Teiknistofu landbúnaðarins 1938-1969. Hann teiknaði fjölmargar opinberar byggingar; héraðsskóla, kaupfélagshús, samkomuhús og verksmiðjuhús víða um landið. Hann var frumkvöðull í gerð húsa með stíl fúnksjónalisma. Dæmi um það eru samvinnuhúsin svokölluðu við Ásvallagötu í Reykjavík og við Helgamagrastræti á Akureyri. Aðrar þekktar byggingar sem Þórir teiknaði eru Alþýðuhúsið við Hverfisgötu og Mjólkurstöðin við Laugaveg sem nú hýsir Þjóðskjalasafnið. Þórir átti þátt í bættum húsakosti til sveita þegar þær nútímavæddust.
Árið 2021 kom út bókin Þórir Baldvinsson - arkítekt.[1] Sjálfur skrifaði Þórir ýmislegt um byggingarlist hér á landi og samdi smásögur og ljóð. Hann skrifaði smásögurnar undir dulnefninu Kolbeinn frá Strönd.
Eiginkona Þóris var Borghildur Jónsdóttir húsfreyja og eignuðust þau þrjú börn.
Tenglar/Heimildir breyta
Tilvísanir breyta
- ↑ Bók um Þórir Baldvinsson Bændablaðið