Galaxian
Galaxian er tölvuleikur sem Namco þróaði og gaf út í Japan í október 1979. Leikurinn átti að veita Space Invaders frá Taito samkeppni. Líkt og í Space Invaders stýrir leikmaður geimskipi neðst á skjánum og getur fært það til hægri eða vinstri. Ofan við það eru raðir af geimverum sem færast taktfast neðar á skjáinn og varpa sprengjum á geimskip leikmannsins. Helsta nýjung leiksins var að með vissu millibili steypa geimverurnar sér niður að geimskipi leikmannsins sem gerði leikinn erfiðari en í Space Invaders. Leikurinn var einn þeirra fyrstu sem nýttu sér litaskjá til hins ýtrasta með marglitum kvikum og sprengingum, bakgrunnstónlist og stjörnuhiminn í bakgrunni sem rúllar upp eftir skjánum. Leikurinn sló í gegn og tveimur árum síðar gaf Namco út framhaldsleikinn Galaga sem náði líka miklum vinsældum.
