Málsvari andskotans

Málsvari andskotans (líka „málsvari myrkrahöfðingjans“ eða „málaflutningsmaður hins vonda“; úr latínu: advocatus diaboli) er heiti yfir aðila sem tekur afstöðu í rökræðum sem er andstæð tiltekinni skoðun, með það fyrir augunum að láta reyna á alla fleti málsins sem rætt er um og finna veika bletti á málflutningi, rökum og sönnunargögnum. Varast ber að nefna málsvara andskotans „lögfræðing andskotans“, því lögfræðingur er annað en málsvari eða málafærslumaður (málaflutningsmaður).

Heitið málsvari andskotans á uppruna sinn að rekja til kaþólsku kirkjunnar þar sem rökrætt var um hvort dýrlingsefni ætti skilið að verða dýrlingur, en þar fóru fremstir málsvari andskotans (advocatus diaboli) sem mælti gegn dýrlingnum, og svo málsvari guðs (advocatus dei) sem mælti með dýrlingnum. Andmælandinn var stundum nefndur promotor fidei, það er sá sem mælir fyrir trúnni.