Þursaflokkurinn

Þursaflokkurinn var hljómsveit sem starfaði á árunum 1978-1982 (ásamt endurkomum, 1991, 2000 og 2008). Hljómsveitin blandaði saman framsæknu rokki og þjóðlegum áhrifum.

Meðlimir hljómsveitarinnar voru í upphafi Egill Ólafsson, Þórður Árnason, Rúnar Vilbergsson, Tómas Magnús Tómasson og Ásgeir Óskarsson. Fyrsta plata hljómsveitarinnar, Hinn íslenzki Þursaflokkur kom út árið 1978. Karl Sighvatsson bættist svo í hópinn áður en önnur plata hljómsveitarinnar, Þursabit, var gefin út.

Textar voru undir áhrifum bókar sr. Bjarna Þorsteinssonar, Íslensk þjóðlög en Egill Ólafsson hafði sökkt sér í það rit.

Sveitin fór tvívegis utan, til Norðurlanda og Hollands, í tónleikaferðalag. Hún lék á sínum síðustu tónleikum árið 1984 en lagðist þó aldrei formlega af. Þursaflokkurinn kom saman árið 1991 í minningu Karls Sighvatssonar sem lést í bílslysi sama ár. Svo kom flokkurinn saman árið 2000 á tónlistarhátíð.

Árið 2008 kom sveitin saman og spilaði í Laugardalshöll ásamt smárri sinfóníuhljómsveit, Caput. Mynddiskur og plata voru gefin út af tónleikunum. Einnig var óútgefið efni sem unnið var að eftir árið 1982 gefið út sem Ókomin forneskjan.

Hljómplötur

• Hinn íslenzki Þursaflokkur (1978)
• Þursabit (1979)
• Grettir - Lögin úr söngleiknum (1981)
• Gæti Eins Verið (1982)
• Ókomin Forneskjan (1984, gefin út 2008)

Tónleikaplötur

• Þursaflokkurinn á hljómleikum (1980)
• Í höllinni á þorra - Hinn íslenski Þursaflokkur og Caput ( 2008)

Tenglar

• Þursaflokkurinn - sjónvarpsmynd frá 1979
• Glatkistan