Valgerður Gunnarsdóttir

Valgerður Gunnarsdóttir (fædd á Dalvík árið 1955) er fyrrverandi alþingismaður Sjálfstæðisflokksins í Norðausturkjördæmi og skólameistari Framhaldsskólans á Húsavík. Valgerður sat í bæjarstjórn á Húsavík frá 1986 til 1998 og var forseti bæjarstjórnar frá 1994 til 1996. Hún var formaður Skólameistarafélags Íslands frá 2009-2013.

Valgerður Gunnarsdóttir (ValG)
3. varaforseti Alþingis
Í embætti 2013–2016
4. varaforseti Alþingis
Í embætti 2016–2017
Alþingismaður
frá til  kjördæmi    þingflokkur 2013 2017  Norðausturkjördæmi  Sjálfstæðisfl.
Persónulegar upplýsingar
Fædd	17. júlí 1955 (1955-07-17) Dalvík
Æviágrip á vef Alþingis

Starfsferill og stjórnmálaþátttaka

Valgerður sat í bæjarstjórn á Húsavík fyrir Kvennalistann frá 1986 til 1998. Hún var forseti bæjarstjórnar frá 1994 til 1996. Á árunum 1986 til 1990 sat hún í stjórn útgerðarfélagsins Höfða á Húsavík. Hún sat í skólanefnd Framhaldsskólans á Húsavík frá 1987 til 1999 og sat í fræðslu- og menningarmálanefnd Húsavíkur frá 1994 til 1999. Valgerður hefur verið í Sjálfstæðisflokknum frá árinu 2008 og náði 2. sæti í prófkjöri flokksins í Norðausturkjördæmi í janúar 2013.

Valgerður var íslenskukennari, deildarstjóri og námsráðgjafi við Framhaldsskólann á Húsavík frá stofnun skólans árið 1987 til ársins 1999, þegar hún var skipuð skólameistari Framhaldsskólans á Laugum. Valgerður var kjörin í stjórn Skólameistarafélags Íslands árið 2000 og var formaður þess frá 2009-2013. Hún hefur verið formaður Samstarfsnefndar framhaldsskóla á Norðurlandi frá árinu 2006.

Menntun

Valgerður lauk landsprófi frá Gagnfræðaskóla Dalvíkur árið 1971. Hún sótti námskeið í matreiðslu fyrir matreiðslumenn á fiskiskipaflotanum við Húsmæðraskólann á Akureyri veturna 1973 og 1974. Hún lauk stúdentsprófi frá Menntaskólanum á Akureyri árið 1975 og BA prófi í íslensku og bókmenntafræði frá Háskóla Íslands árið 1982. Árið 1996 lauk hún námi í uppeldis- og kennslufræði frá Háskólanum á Akureyri.

Fjölskylda

Valgerður er fædd á Dalvík árið 1955. Foreldrar hennar eru Ásta Jónína Sveinbjarnardóttir og Gunnar Þór Jóhansson skipstjóri. Eiginmaður hennar er Örlygur Hnefill Jónsson lögmaður og varaþingmaður á Húsavík. Börn þeirra eru Emilía Ásta Örlygsdóttir (fædd 1977), Örlygur Hnefil Örlygsson (fæddur 1983) og Gunnar Hnefil Örlygsson (fæddur 1990). Börn Valgerðar reka hótel og ferðaþjónustu á Húsavík. Tengdafaðir Valgerðar var Jón Hnefill Aðalsteinsson (1927-2010), prófessor í þjóðfræði við Háskóla Íslands.

Tenglar

• Vefsíða Framhaldsskólans á Laugum

Heimildir

• Morgunblaðið: Valgerður gefur kost á sér í 2. sæti. Skoðað þann 21. janúar 2013.
• Morgunblaðið: Valgerður Gunnarsdóttir ráðin skólameistari á Laugum. Skoðað þann 21. janúar 2013.
• Íslendingur: Norðausturland – kjörlendi öflugra tækifæra. Skoðað þann 21. janúar 2013.
• Alþingi, æviágrip: Örlygur Hnefill Jónsson. Skoðað þann 21. janúar 2013.
• Morgunblaðið: Skólastarf á Laugum 80 ára. Skoðað þann 21. janúar 2013.
• Morgunblaðið: Uppbygging og útsjónarsemi. Skoðað þann 21. janúar 2013.

Fyrirrennari: Þorvaldur Vestmann Magnússon	Forseti bæjarstjórnar á Húsavík (1994 – 1996)	Eftirmaður: Katrín Eymundsdóttir
Fyrirrennari: Hjalti Jón Sveinsson	Skólameistari Framhaldsskólans á Laugum (1999 – enn í embætti)	Eftirmaður: enn í embætti