Keilir - Miðstöð vísinda, fræða og atvinnulífs

Keilir – Miðstöð vísinda, fræða og atvinnulífs

Keilir - Miðstöð vísinda, fræða og atvinnulífs er leiðandi og framsækið menntafyrirtæki á Suðurnesjum. Keilir skiptist í fjóra skóla sem innihalda fjölbreytt námsframboð þar sem áhersla er á að laga sig að þörfum og kröfum nútímanemenda. Skólarnir eru Háskólabrú, Heilsuakademía, Flugakademía Íslands og Menntaskólinn á Ásbrú. Keilir hefur það að markmiði að byggja upp námsmannasamfélag þar sem boðið er upp á vandað nám með áherslu á nýstárlega kennsluhætti og fyrsta flokks aðstöðu. Keilir starfar samkvæmt þjónustusamningi við mennta- og barnamálaráðuneytið um kennslu á framhaldsskólastigi.

Háskólabrú

Háskólabrú Keilis býður upp á nám fyrir einstaklinga sem hafa ekki lokið stúdentsprófi en vilja stefna á háskólanám eða styrkja sig á vinnumarkaði. Keilir er eini skólinn sem býður upp á aðfaranám í samstarfi við Háskóla íslands og gildir námið til inntöku í allar deildir Háskóla Íslands. Háskólabrú hefur undanfarin ár markað sér sérstöðu í að veita einstaklingsmiðaða þjónustu og stuðning við nemendur. Nám á Háskólabrú hefur gefið fjölda fólks nýtt tækifæri til náms og hafa flestir útskrifaðir nemendur hafið háskólanám að náminu loknu, við góðan orðstír. Fyrstu nemendur Háskólabrúar Keilis hófu nám haustið 2007 og eins og áður sagði starfar skólinn í samstarfi við Háskóla Íslands. Haustið 2008 skrifaði Keilir og Háskóli Íslands undir samning þess eðlis að próf á Háskólabrú skuli samkvæmt samningnum almennt teljast sambærilegt stúdentsprófi og veitir inngöngu í þær deildir sem vísa í svið innan Háskóla Íslands. Þá hafa margir útskrifaðir nemendur einnig sótt nám í öðrum háskólum hérlendis og erlendis en eftir þeirra inntökuskilyrðum hverju sinni.

Heilsuakademía

Heilsuakademían býður upp á fjölbreytt nám sem tengist heilsu og heilsueflingu. Meðal námsframboðs Heilsuakademíu Keilis er einkaþjálfun, styrktarþjálfun, fótaaðgerðafræði auk námskeiða á borð við undirbúningsnámskeið fyrir Inntökupróf Læknadeildar Háskóla Íslands ásamt vinnuverndarnámskeiðum.

Boðið hefur verið upp á nám í einkaþjálfun allt frá stofnun Keilis árið 2007. Námið hefur notið mikilla vinsælda frá upphafi og er nú orðið viðurkennt starfsnám á þriðja hæfniþrepi samkvæmt viðmiðum mennta- og barnamálaráðuneytis. Nám í styrktarþjálfun íþróttafólks hefur verið í boði frá árinu 2015 og hefur náð að festa sig í sessi sem valmöguleiki fyrir þá sem hafa áhuga fyrir þjálfun innan íþróttageirans.

Nám í fótaaðgerðfræði var tekið upp árið 2017 og er viðurkennt starfsnám á þriðja hæfniþrepi samkvæmt viðmiðum mennta- og barnamálaráðuneytis. Fótaðgerðafræðingur er lögverndað starfsheiti og veitir Embætti landlæknis útskrifuðum nemendum starfsleyfi.

Undirbúningsnámskeið fyrir Inntökupróf Læknadeildar Háskóla Íslands færðist yfir til Keilis árið 2018 eftir að hafa verið starfrækt frá árinu 2003. Námskeiðið hefur notið mikilla vinsælda meðal þeirra sem hyggja á nám í læknisfræði eða sjúkraþjálfunarfræði og hefur hefur nemendafjöldi talið nokkur hundruð á hverju ári.

Vinnuverndaskóli Íslands bættist svo í flóru Heilsuakademíunnar árið 2020 og þar eru í boði ýmis námskeið sem tengjast vinnuvernd s.s námskeið sem veita réttindi til starfa á vinnuvélum.

Flugakademía Íslands

Flugakademía Íslands býður upp á flugnám í fremstu röð og er skólinn einn öflugasti flugskóli á Norðurlöndunum. Skólinn er með nýjustu og tæknivæddustu kennsluvélar landsins, fullkomna flugherma og á þriðja hundrað flugnema.

Flugakademía Íslands býður uppá einkaflugnám, atvinnuflugnám, flugkennaranám ásamt fjölbreyttu úrvali námskeiða fyrir flugmenn. Námið tekur mið af samevrópskri námsskrá til útgáfu flugskírteina sem gefin er út af EASA - Flugöryggisstofnun Evrópu og er því kennt samkvæmt EASA Part-FCL stöðlum. Námið er samþykkt af Samgöngustofu og lítur eftirliti þeirra.

Menntaskólinn á Ásbrú

Menntaskólinn á Ásbrú hefur frá árinu 2019 boðið nemendum að stunda nám á metnaðarfullri stúdentsbraut í tölvuleikjagerð. Námið byggir á hagnýtum verkefnum og sterkum tengslum við atvinnulífið. Lögð er áhersla á færni til framtíðar, nútíma kennsluhætti og vinnuaðstöðu í sérklassa. Námsframboð í MÁ er í stöðugri þróun og er í dag þar einnig starfrækt fjarnámshlaðborð með stökum framhaldsskólaáföngum sem kenndir eru í fjarnámi sem hægt er að taka hvenær sem er.