Másstaðir í Skíðadal

Másstaðir, eða Ytri-Másstaðir, er bær í Skíðadal og tilheyrir Dalvíkurbyggð. Bærinn er vestan Skíðadalsár og stendur undir bröttum hlíðum Stólsins milli Dælis og Þverár. Másstaðir er gömul jörð og sumir telja að Möðruvellir þeir sem getið er um í Svarfdæla sögu hafi verið Másstaðir. Hálfkirkja var á Másstöðum fram eftir öldum. Másstaðir voru jafnan í bændaeign. Árið 1652 féll snjóflóð eða skriða á bæinn og eyðilagði hann. Nokkru síðar var jörðinni skipt í tvennt Ytri- og Syðri-Másstaði. Árið 1811 stórskemmdu skriður tún á báðum bæjunum og sópuðu með sér fjósi, kúm og heyi á Syðri-Másstöðum. Ytri-Másstaðir reyndist betri og farsælli jörð. Syðri-Másstaðir fóru endanlega í eyði eftir skriðuföll 1929 en landareignin var sameinuð Þverá.

Heimild: Srefán Aðalsteinsson 1976. Svarfdælingar. Fyrra bindi. Iðunn Reykjavík