La Belle Province

La Belle Province eftir franska teiknarann Achdé (Hervé Darmenton) og höfundinn Laurent Gerra er 73. bókin í bókaflokknum um Lukku Láka. Bókin kom út árið 2004 og er fyrsta bókin í bókaflokknum sem ekki er teiknuð af belgíska teiknaranum Morris (Maurice de Bevere). Bókin hefur ekki komið út í íslenskri þýðingu.

Kápa frönsku útgáfu bókarinnar

Söguþráður

Lukku Láki leitar útlagans Brad Garrett og tekur þátt í reiðkeppni þar sem hann grunar að Brad leynist. Þar kynnist hann Mario Bombardelli frá Québec í Kanada sem kominn er til að taka þátt í reiðkeppninni á merinni Province. Brad Garrett kemst undan, en Léttféti verður bálskotinn í Province. Þegar Mario og Province snúa aftur til Québec verður Léttfeti þunglyndur og Lukku Láki sér þann kost vænstan að ferðast til Québec með Léttfeta og hundinum Rattata. Þeir koma til bæjarins Contrecoeur og kemur þá í ljós að flokkur glæpamanna hefur herjað á bæjarbúa með póstvagnaránum og öðrum óskunda. Við þetta bætist að bíræfinn bankamaður, MCabin, er að kaupa upp öll hús og lóðir í bænum af ókunnum ástæðum og ásælist jörð Mario´s Bombardelli í nágrenni bæjarins. Í ljós kemur að MCabin stendur á bak við ránin ásamt hjálparhellu sinni, Nestor, og að tilgangur þeirra er að sölsa undir sig allt land í héraðinu þar sem áform eru uppi um lagningu járnbrautarteina frá Québec til Washington með tilheyrandi verðmætaaukningu landsins.

Fróðleiksmolar

Bærinn Contrecoeur í Quebec í kringum 1910.

• La Belle Province er fyrsta Lukku Láka bókin sem ekki er teiknuð af skapara Lukku Láka, Morris, sem lést árið 2001. Þeir Achdé og Gerra voru þá ráðnir til að halda áfram að semja og teikna bækur í bókaflokknum, en Achdé hafði áður verið aðstoðarmaður Morris. Nafni bókaflokksins var breytt eftir dauða Morris í Ævintýri Lukku Láka (f. Les adventures de Lucky Luke) og er La Belle Province fyrsta bókin sem kom út undir þeim titli.
• Sagan gerist að mestu leyti í Québec og hefur að geyma fjölmargar skírskotanir til sögu og menningar þessa frönskumælandi ríkis Kanada. Bærinn Contrecoeur er nú yfir 6000 manna borg skammt frá Montréal. Í sögunni háma bæjarbúar í sig poutine, þ.e. franskar kartöflur með osti og sósu, en þessi skyndibiti er upprunninn í Québec og er nú nokkurs konar þjóðarréttur í Kanada. Þá eru ýmsar persónur sögunnar skopstælingar á þekktu fólki úr lista- og menningargeiranum af frönskum eða kanadískum uppruna, t.d. söngkonunni Céline Dion og franska aktívistanum José Bové.
• Bankamaðurinn McCabin reynist vera ástríðufullur safnari muna sem tengjast sögu Villta Vestursins og hann falast eftir hinni frægu sjöhleypu Lukku Láka. Þetta er skírskotun til bókarinnar Lukku Láki og Langi Láki þar sem sjöhleypan kemur Láka að góðum notum.
• Heiti bókarinnar skírskotar í senn til Québec fylkis og til merarinnar Province sem gengur í augun á Léttfeta.