Lúðrasveit Reykjavíkur
Lúðrasveit Reykjavíkur (skammst. LR) er íslensk lúðrasveit sem var formlega stofnuð þann 7. júlí 1922. Sveitin varð til við sameiningu tveggja félaga, Lúðrafélagsins Hörpu og Lúðrafélagsins Gígju. Fyrsti stjórnandi hennar var Otto Böttcher, þýskur hornleikari sem fenginn hafði verið hingað til lands af Jóni Leifs.
Lúðrasveitin hefur síðan 1922 átt höfuðstöðvar í Hljómskálanum, sem er staðsettur við Tjörnina í Reykjavík og Hljómskálagarðurinn heitir eftir, en það hús var byggt sérstaklega fyrir sveitina (upphaflega ætlað Lúðrafélaginu Hörpu).
Upphaflega voru aðeins fullorðnir karlmenn í sveitinni, en með tímanum hefur yngra fólk bæst í hópinn, ásamt því sem konur eiga nú fastan sess í sveitinni.
Núverandi stjórnandi er Lárus Halldór Grímsson, sem stjórnaði lengst af Skólahljómsveit Vesturbæjar og Miðbæjar samhliða, en upp úr þeirri sveit hafa margir af yngri spilurum LR komið. Sveitin heldur fáeina stærri tónleika á vetri, oftast í Reykjavík, en stundum á öðrum stöðum á landinu, þar sem leikin er hefðbundin lúðrasveitartónlist ásamt djasstónlist, þjóðlagatónlist, kvikmyndatónlist, dægurlagaútsetningar og klassískri tónlist fyrir. Sveitin leikur utandyra á sumrin við tækifæri svo sem á sjómannadaginn og 17. júní, og marserar við ættjarðarlög eða t.d. bandaríska marsa.