Hannibal Sehested (forsætisráðherra)

Hannibal Sehested (16. nóvember 184219. september 1924) var danskur landeigandi og forsætisráðherra í rúmlega ár, frá 1900 til 1901. Hann var síðasti forsætisráðherrann sem konungur Danmerkur skipaði í óþökk þingsins áður en þingræði komst á í landinu.

Hannibal Sehested
Forsætisráðherra Danmerkur
Í embætti
27. apríl 1900 – 24. júlí 1901
ÞjóðhöfðingiKristján 9.
ForveriHugo Hørring
EftirmaðurJohan Henrik Deuntzer
Persónulegar upplýsingar
Fæddur16. nóvember 1842
Gudme, Fjóni, Danmörku
Látinn19. september 1924 (81 árs) Gudme, Fjóni, Danmörku
ÞjóðerniDanskur
StjórnmálaflokkurHægriflokkurinn
HáskóliKaupmannahafnarháskóli

Ævi og störf breyta

Sehsted fæddist á Fjóni, sonur stóreigna- og aðalsfólks. Hann lauk lagaprófi frá Kaupmannahafnarháskóla árið 1869. Að því loknu sinnti hann búrekstri samhliða lögfræðistörfum. Árið 1886 var hann kjörinn á þing fyrir Hægriflokkinn og sat þar til ársins 1910.

Þegar stjórn Reedtz-Thott féll árið 1897 var Sehsted orðaður við stöðu forsætisráðherra. Af því varð þó ekki. Hins vegar lét hann undan þrýstingi frá konungi og Estrup fyrrum forsætisráðherra að taka við stjórnartaumunum á vormánuðum 1900. Auk forsætisráðherraembættisins gegndi Sehsted jafnframt stöðu utanríkisráðherra.

Í júlímánuði 1900 flutti Friðrik krónprins ræðu þar sem hann lofsöng ríkisstjórn Sehsted, sem hann sagði skipaða þróttmiklum ættjarðarvinum. Ræðan var eins og rauð dula sem veifað var framan í leiðtoga Venstre. Fyrir vikið gusu deilurnar milli Hægriflokksins og Venstre upp á nýjan leik.

Gengið var til þingkosninga í byrjun apríl 1901, þar sem Hægriflokkurinn beið afhroð og missti helming þingflokks síns, sat eftir með einungis átta fulltrúa. Í kjölfarið óskaði konungur þess af stjórninni að hún bæðist lausnar og við tók tími þingræðis í Danmörku.

Eftir að hafa hrökklast úr forsætisráðuneytinu hafði Sehsted litlu hlutverki að gegna í dönskum stjórnmálum, þótt hann sæti enn um sinn sem þingmaður. Hann lést árið 1924.

Ítarefni breyta

  • P. Stavnstrup, „Hannibal Sehested“, í: Povl Engelstoft & Svend Dahl (ritsj.), Dansk Biografisk Leksikon, København: J.H. Schultz Forlag 1932-44.
  • Kraks Blaa Bog 1910.


Fyrirrennari:
Hugo Hørring
Forsætisráðherra Danmerkur
(27. apríl 190024. júlí 1901)
Eftirmaður:
Johan Henrik Deuntzer