„Kirkjuból (Miðnesi)“: Munur á milli breytinga

'''Kirkjuból''' er jörð og áður bær á [[Miðnes]]i, norðarlega. Kirkjuból var mikil og góð [[Jörð (landsvæði)|jörð]] fyrr á öldum en hefur hrakað mjög vegna [[landbrot]]s og auðnar í [[Miðnesheiði (Keflavík)|Miðnesheiði]] af völdum [[hrísrif]]s og [[ofbeit]]ar.

Á [[15. öld]] snemma bjó á Kirkjubóli [[Vigfús Hólm]], [[hirðstjóri]] ásamt börnum sínum, Ívari Vigfússyni Hólm og Margréti Vigfúsdóttur. Árið [[1433]] var [[Jón Gerreksson]] [[biskup]] í [[Skálholt]]i og hafði um sig sveit manna, sem voru hinir verstu ribbaldar. Forsprakki þeirra hét Magnús og er titlaður kæmeistari, en það mun líklega vera sama og bryti. Hann bað Margrétar Vigfúsdóttur, en fékk hryggbrot. Til þess að hefna fyrir þá hneisu gerðu sveinar Jóns Gerrekssonar áhlaup á bæinn á Kirkjubóli. Lögðu þeir eld í bæinn og drápu alla nema Margréti, en hún komst ein úr brennunni og gat flúið á hesti. Komst hún norður í land segir sagan, og sór að giftast þeim manni einum, sem hefndi brennunnar. Til þess urðu [[Þorvarður Loftsson]] (sonur Lofts ríka Guttormssonar) á [[Möðruvellir (Eyjafjarðarsveit)|Möðruvöllum]] í [[Eyjafjörður|Eyjafirði]] og vinur hans, [[Teitur Bjarnason]] í [[Bjarnanes]]i í [[Hornafjörður|Hornafirði]], en þeir fóru með her í Skálholt og drápu biskupssveina og drekktu Jóni biskupi í [[Brúará]]. Voru þeir frekar að hefna harma sinna en Margrétar, en hún giftist síðar Þorvarði og voru þau ríkustu hjón á Íslandi á sinni tíð.