„John Lennon“: Munur á milli breytinga

Enskur tónlistarmaður og meðlimur Bítlanna (1940-1980)
Efni eytt Efni bætt við
Ekkert breytingarágrip
(Enginn munur)

Útgáfa síðunnar 24. nóvember 2006 kl. 01:38

John Winston Ono Lennon, (9. október, 1940 - 8. desember, 1980), (fæddur John Winston Lennon) var enskur tónlistarmaður og lagahöfundur. Hann var helst þekktur sem stofnandi og meðlimur Bítlanna.

John Lennon var fæddur í Liverpool á Englandi, móðir hans var Julia Stanley Lennon og faðir hans var Alfred Lennon (kallaður Freddie). Þegar John var ungur drengur yfirgaf faðir hans fjölskylduna og í kjölfarið fól móðir hans systur sinni, Mary Smith (kölluð Mimi), að ala hann upp. Hjá Mimi frænku sinni og hennar manni var John það sem eftir var barnæsku sinnar og á unglingsárum, en hitti þó móður sína reglulega.

Árið 1957 varð til fyrsta mynd hljómsveitarinnar sem síðar varð þekkt sem Bítlarnir. Hún hét í fyrstu The Quarrymen og var John leiðtogi hennar. Skömmu eftir stofnun sveitarinnar hitti John Paul McCartney í fyrsta skipti og varð hann fljótlega meðlimur. Þeir fóru fljótlega að semja lög saman og gerðu þeir með sér samkomulag um að þeir yrðu skráðir sameiginlega sem höfundar fyrir öllum lögum sem annar hvor eða þeir báðir semdu. Þetta samkomulag hélst allt þar til Bítlarnir hættu sem hljómsveit og því eru öll lög sem Lennon samdi fyrir Bítlana (einn eða með McCartney) skráð með höfundarréttinn Lennon-McCartney.

Árið 1958, þegar John var 17 ára, dó Julia Lennon í bílslysi. Þessi atburður hafði mikil áhrif á John og síðar skírði hann son sinn, Julian, í höfuðið á henni. Einnig samdi hann lagið "Julia" til hennar. Julia hafði sjálf haft tónlistarhæfileika og kenndi John að spila á banjó.

George Harrison gekk til liðs við The Quarrymen árið 1958, og Ringo Starr árið 1960, eftir að nafni hljómsveitarinnar hafði verið breytt í The Beatles. Lennon er almennt talinn hafa verið leiðtogi sveitarinnar á upphafsárum hennar.

Árið 1962 giftist John Cynthiu Powell, sem hann hafði verið í sambandi við í nokkur ár, og árið 1963 eignuðust þau soninn Julian. Þegar vinsældir Bítlanna fóru að aukast, á árinu 1963, ráðlagði umboðsmaður þeirra, Brian Epstein, John að halda hjónabandinu leyndu frá almenningi. Cynthia Lennon var því aldrei í sviðsljósinu þrátt fyrir hinar gífurlegu vinsældir Bítlanna. Þau skildu árið 1968 eftir að Cynthia komst að því að John hafði verið að halda framhjá sér með japönsku listakonunni Yoko Ono.

Lennon og Ono urðu brátt óaðskiljanleg og voru saman nánast öllum stundum. Yoko fylgdi Lennon iðulega í stúdíóið þar sem Bítlarnir sömdu og tóku upp lög. Margir hafa talið að þetta hafi verið ein aðal ástæða þess að hljómsveitin liðaðist í sundur, þar sem þetta á að hafa valdið togstreitu innan sveitarinnar. Lennon og Ono giftust árið 1969

Árið 1969 tilkynnti Lennon hinum bítlunum að hann væri hættur í hljómsveitinni, hann var þó beðinn um, af forstjóra Apple útgáfufyrirtækisins, að halda því leyndu að hann væri hættur. Í Apríl 1970 tilkynnti Paul McCartney það opinberlega að Bítlarnir væru hættir saman, án þess að ráðfæra sig við hina Bítlana.

Lennon hóf sólóferil strax eftir að bítlarnir hættu saman og gaf út plötuna Plastic Ono Band árið 1970. Árið 1971 kom svo út platan Imagine, þar sem er m.a. að finna lagið "Imagine", eitt frægasta lag Lennons.

Árið 1972 fluttust Lennon og Ono til New York og átti Lennon aldrei eftir að koma aftur til Englands eftir það.

1972 kom út platan Some Time in New York City og 1973 kom út platan Mind Games.

Plöturnar Walls and Bridges (1974) og Rock 'n' Roll (1975) komu út á tímabili í lífi Lennons sem vanalega er kallað "The Lost Weekend". Á þessum tíma voru hann og Yoko aðskilin og bjó hann í Los Angeles en hún í New York. Þetta tímabil einkenndist af miklu sukki af hálfu Lennons.

Árið 1975 fór hann aftur til New York og tók saman við Yoko. Þau eignuðust soninn Sean sama ár. Næstu árin voru róleg í lífi Lennons og sneri hann sér alfarið frá tónlist og einbeitti sér að því að vera heimilisfaðir.

Árið 1980 fór hann að taka upp tónlist á nýjan leik og það gerði Yoko einnig. Afraksturinn varð platan Double Fantasy þar sem hvort um sig samdi og söng helminginn af lögunum.

8. desember sama ár lést John Lennon svo með sviplegum hætti þegar Mark David Chapman, geðsjúkur "aðdáandi", skaut Lennon fimm sinnum í bakið fyrir utan Dakota bygginguna í New York, þar sem John og Yoko áttu heima.