Gaston Doumergue

Gaston Doumergue (1. ágúst 1863 – 18. júní 1937) var franskur stjórnmálamaður og forseti Frakklands frá 1924 til 1931. Hann var einnig forsætisráðherra Frakklands bæði fyrir og eftir forsetatíð sína. Doumergue er bæði eini mótmælandinn sem hefur gegnt forsetaembætti Frakklands og eini forsetinn sem kvæntist á meðan hann var í embætti. Doumergue er almennt talinn með vinsælli forsetum Frakklands, sérstaklega miðað við hinn umdeilda forvera sinn, Alexandre Millerand.

Gaston Doumergue

Þegar Alexandre Millerand neyddist til að segja af sér sem forseti árið 1924 var Doumergue, sem var þá forseti franska þingsins, kjörinn til að taka við embættinu. Sem forseti Frakklands opnaði Doumergue sumarólympíuleikana árið 1924 í París. Doumergue tók þá ákvörðun að senda Philippe Pétain til Rif í Marokkó til að hjálpa Spánverjum að kveða niður uppreisn gegn nýlendustjórn þeirra. Um svipað leyti tók Doumergue einnig á móti marokkóska soldáninum Moulay Youssef og opnaði með honum Parísarmoskuna. Árið 1930 heimsótti Doumergue Alsír til að fagna hundrað ára afmæli franskra yfirráða í landinu.