Skólahljómsveit Kópavogs

Skólahljómsveit Kópavogs er íslensk skólalúðrasveit, stofnuð af Birni Guðjónssyni, trompetleikara árið 1966. Um 150 hljóðfæraleikarar eru að jafnaði í hljómsveitinni, en henni er skipt niður í þrjár sveitir, A-sveit, B-sveit og C-sveit, með tilliti til aldurs og getu. Frá stofnun til ársins 1993 var aðalstjórnandi og skólastjóri sveitarinnar stofnandinn, Björn Guðjónsson, en þá tók Össur Geirsson, básúnuleikari og útsetjari, við stjórninni.

Æfinga- og kennsluhúsnæði hljómsveitarinnar er í Digranesi við Skálaheiði í Kópavogi, en áður var hljómsveitin til húsa í kjallara íþróttahúss Kársnesskóla og í Ástúni 8.