Elizabeth Warren

Bandarískur stjórnmálamaður

Elizabeth Ann Warren (f. undir nafninu Herring 22. júní 1949) er bandarískur stjórnmálamaður sem hefur setið á öldungadeild Bandaríkjaþings fyrir Massachusetts-fylki frá árinu 2013. Warren er meðlimur í Demókrataflokknum og er gjarnan talin til framfarasinnaðari og vinstrisinnaðari meðlima hans. Sem öldungadeildarþingmaður hefur Warren talað fyrir neytendavernd, fjárhagsaðstoð og samfélagsvelferð og hefur auk þess stutt það að Donald Trump Bandaríkjaforseti verði ákærður fyrir embættisbrot.[1] Warren var frambjóðandi í forvali Demókrataflokksins fyrir forsetakosningarnar 2020.[2]

Elizabeth Warren
Elizabeth Warren árið 2016.
Öldungadeildarþingmaður fyrir Massachusetts
Núverandi
Tók við embætti
3. janúar 2013
ForveriScott Brown
Persónulegar upplýsingar
Fædd22. júní 1949 (1949-06-22) (74 ára)
Oklahomaborg, Oklahoma, Bandaríkjunum
ÞjóðerniBandarísk
StjórnmálaflokkurDemókrataflokkurinn (1996–)
MakiJim Warren (g. 1968; skilin 1978)
Bruce H. Mann (g. 1980)
Börn2
HáskóliGeorge Washington-háskóli
Háskólinn í Houston
Rutgers-lagaskóli
Undirskrift

Æviágrip breyta

Warren er með gráður frá Háskólanum í Houston og Rutgers-lagaskólanum og hefur unnið sem kennari við ýmsa háskóla, meðal annars Háskólann í Houston, Texas-háskóla í Austin, Pennsylvaníuháskóla og Harvard-háskóla. Hún var meðal áhrifamestu fræðimanna á sviði verslunarréttar í Bandaríkjunum áður en hún hóf þátttöku sína í stjórnmálum.

Warren er virkur talsmaður fyrir neytendaréttindum og átti meðal annars frumkvæði að stofnun bandarísku Neytendaverndarstofnunarinnar (e. Consumer Financial Protection Bureau) árið 2011.[3] Warren hefur samið ýmis fræðirit og hefur gjarnan birst sem álitsgjafi um efnahagsmál í bandarískum fjölmiðlum. Eftir fjármálakreppuna 2008 var Warren ráðin í þingnefnd sem hafði það hlutverk að stýra neyðarlánagreiðslum TARP-sjóðsins til bágstaddra fjármálastofnana.[4] Síðar útnefndi Barack Obama Bandaríkjaforseti Warren í embætti aðstoðarmanns forsetans og ráðgjafa við Neytendaverndarstofnunina.[5]

Í september árið 2011 tilkynnti Warren framboð sitt fyrir Demókrataflokkinn til öldungadeildar Bandaríkjaþings í Massachusetts-fylki. Í kosningunum þann 6. nóvember 2012 sigraði hún sitjandi öldungadeildarþingmann Repúblikanaflokksins, Scott Brown, og tók við þingsæti hans í janúar næsta ár. Hún er fyrsta konan til að setjast á öldungadeildina fyrir Massachusetts.[6]

Warren hefur verið ein af forystumönnum Demókrataflokksins á þingi og einn helsti talsmaður framfarasinnaðra stjórnmála á öldungadeildinni. Margir litu á Warren sem mögulegt forsetaefni í forsetakosningunum árið 2016 en Warren sjálf neitaði að bjóða sig fram og kvaðst heldur vilja vera áfram á öldungadeildinni.[7] Hún var hlutlaus í forkosningum Demókrataflokksins fyrir forsetakosningarnar en lýsti yfir stuðningi við framboð Hillary Clinton eftir að forvalinu var lokið.[8] Eftir að Clinton vann útnefningu flokksins í kosningunum var litið á Warren sem mögulegt varaforsetaefni í framboði Clintons[9] en Clinton útnefndi síðar öldungadeildarþingmanninn Tim Kaine í það hlutverk.[10]

Warren hefur sætt gagnrýni fyrir að hafa í kosningabaráttu sinni 2012 vísað til meintra ættartengsla móður sinnar til amerískra frumbyggja af sérókaþjóðerni og fyrir að hafa verið skráð sem afkomandi frumbyggja í gögnum Harvard-háskóla. Donald Trump Bandaríkjaforseti hefur ítrekað gert gys að henni fyrir þetta og uppnefnt hana „Pókahontas“. Í október 2018 birti Warren niðurstöður erfðaprófs sem sannaði að hún á ættir að rekja til norður-amerískra frumbyggja[11] en hlaut þó nokkra gagnrýni af hálfu talsmanna séróka fyrir að hafa vísað til ættartengsla við frumbyggja á svo veikum grundvelli og baðst síðar afsökunar fyrir gjörninginn.[12]

Warren lýsti því yfir þann 10. febrúar 2019 að hún hygðist gefa kost á sér í forvali Demókrataflokksins fyrir forsetakosningarnar 2020 og freista þess að verða frambjóðandi flokksins gegn Trump.[2] Warren dró framboð sitt til baka þann 5. mars 2020 eftir slakt gengi í forkosningum Demókrataflokksins tveimur dögum fyrr.[13]

Stjórnmálaskoðanir breyta

Gagnasíðan GovTrack taldi Warren frjálslyndasta meðlim öldungadeildarinnar árin 2015–2017.[14]

Warren gagnrýndi Barack Obama árið 2015 fyrir stuðning hans við fríverslunarsamninginn Trans-Pacific Partnership (TPP), sem hún taldi að myndi ekki þjóna hagsmunum bandarískra verkamanna.[15][16]

Í janúar árið 2019 gagnrýndi Warren Trump forseta fyrir áætlanir sínar um að kalla bandaríska hermenn heim frá átökunum í Sýrlandi og stríðinu í Afganistan. Þrátt fyrir að hafa stutt endalok hernaðaraðgerða í Sýrlandi og Afganistan sagði hún að slíkt yrði að vera gert í samráði við bandamenn Bandaríkjanna á svæðinu.[17]

Tilvísanir breyta

  1. „Vill kæra Trump fyrir brot í starfi“. RÚV. 20. apríl 2019. Sótt 25. september 2019.
  2. 2,0 2,1 Ævar Örn Jósepsson (10. febrúar 2019). „Warren ætlar í Hvíta húsið“. RÚV. Sótt 25. september 2019.
  3. „The Glory Days of Elizabeth Warren's CFPB Are Numbered“ (enska). Sótt 25. september 2019.
  4. Kantor, Jodi (25. mars 2010). „Behind Consumer Agency Idea, a Tireless Advocate“. The New York Times. Sótt 25. september 2019.
  5. „President Obama Names Elizabeth Warren Assistant to the President and Special Advisor to the Secretary of the Treasury on the Consumer Financial Protection Bureau“ (enska). Sótt 25. september 2019.
  6. „Warren wins Massachusetts Senate race“ (enska). Politico. Sótt 25. september 2019.
  7. "Ég ætla ekki í framboð". Kjarninn. 31. mars 2015. Sótt 25. september 2019.
  8. „Warren endorses Clinton“ (enska). Sótt 25. september 2019.
  9. „Hillary Clinton is choosing her vice president soon. Here are her top choices“ (enska). Sótt 25. september 2019.
  10. „Hillary Clinton picks Tim Kaine to be vice president“ (enska). Sótt 25. september 2019.
  11. „Sýndi fram á frumbyggjablóð eftir ítrekaðar Pocahontas-háðsglósur Trumps“. Vísir. 16. október 2018. Sótt 25. september 2019.
  12. Oddur Ævar Gunnarsson (1. febrúar 2019). „Biður frum­byggja af­sökunar á DNA prófi“. Fréttablaðið. Sótt 25. september 2019.
  13. „War­ren hyggst draga fram­boðið til baka“. mbl.is. 5. mars 2019. Sótt 6. mars 2020.
  14. „Report Cards for 2016 - Ideology Score - All Senators - GovTrack.us“ (enska). GovTrack. Sótt 25. september 2019.
  15. "Warren lashes back at Obama on trade". The Hill. Sótt 25. september 2019.
  16. "Elizabeth Warren target Trans-Pacific Trade Deals". Politico. Sótt 25. september 2019.
  17. Justin Wise (3. janúar 2019). „Warren on Syria troop pullout: Foreign policy shouldn't be conducted on Twitter“ (enska). The Hill. Sótt 25. september 2019.