Árni Hafstað
Árni Jónsson Hafstað bóndi í Vík í Skagafirði f. 23. maí 1883 á Hafsteinsstöðum d. 22.júní 1969. Foreldrar hans voru Jón Jónsson (1850-1939) bóndi og hreppsstjóri á Hafsteinsstöðum og kona hans Steinunn Árnadóttir (1851-1933). Árni ólst upp hjá foreldrum sínum á Hafsteinsstöðum til 18 ára aldurs en þá fór hann til náms einn vetur til sr. Árna Björnssonar á Sauðárkróki. Næstu tvo vetur var hann á Bændaskólanum á Hólum en fór að því búnu til Akureyrar og lærði garðyrkju og meðferð garðyrkjutækja í Gróðrarstöðinni. Vorið 1906 hélt hann til Danmerkur og Noregs til frekara náms í búfræði. Þar dvaldist hann á annað ár. Vorið 1908 hóf hann búskap í Vík í Staðarhreppi ásamt Sigríði systur sinni. Þar reistu þau stórt hús úr steinsteypu, eitt hið fyrsta þeirrar gerðar í Skagafirði. Í utanför sinni kynntist Árni lýðháskólahreyfingunni á Norðurlöndum og fékk þar mikinn áhuga á alþýðufræðslu. Það varð til þess að hann hann stofnaði unglingaskóla í samvinnu við sveitunga sinn Jón Sigurðsson frá Reynistað. Skólinn tók til starfa í ársbyrjun 1909 í hinu nýreista steinhúsi í Vík. Hann starfaði þó ekki nema í tvö ár en þá var kominn unglingaskóli á Sauðárkróki sem tók starfssemina yfir.
Árni var hugsjóna- og félagsmálamaður. Hann átti þátt í stofnun Ungmennafélagsins Æskunnar í Skagafirði og Ungmennafélagsins Tindastóls [1] á Sauðárkróki. Hann var einn af stofnendum Ungmennafélagasambands Skagafjarðar og fyrsti ritari þess. Hann var samvinnumaður og deildarstjóri í Staðardeild Kaupfélags Skagfirðinga, í stjórn Kaupfélagsins sat hann 1938-1947 og var kjörinn heiðursfélagi þess er hann varð 75 ára. Árni var einn af aðalhvatamönnum þess að koma á stofn héraðsskóla í Varmahlíð sem var fyrsti vísir að þorpinu sem þar er nú.
Árni Hafstað kvæntist 13. mars 1914. Kona hans var Ingibjörg Sigurðardóttir f. 16. júlí 1893 í Valadal, d. 4. október 1932 í Vík. Ingibjörg ólst upp með foreldrum sínum, sem lengst af bjuggu á Geirmundarstöðum í Sæmundarhlíð. Hún var í unglingaskólanum í Vík 1909, síðan hélt hún til Reykjavíkur og nam við Kvennaskólann 1911-1914 en flutti þá í Vík. Ingibjörg lést langt fyrir aldur fram frá stórum barnahópi. Þau Árni áttu saman 11 börn:
- Árni 1915-1994
- Sigurður Hersteinn 1916-2003
- Páll Steinþór 1917-1987
- Steinunn Alda 1919-2005
- Jón Haukur 1920-2008
- Ingibjörg Erla 1921-2000
- Sigmar Halldór 1924
- Margrét Sigríður 1925-1926
- Sigríður Margrét 1927
- Guðbjörg 1928-1966
- Valgerður Birna 1930-2011
- Ragnar Örn (1921-2005) var sonur Árna og Hallfríðar S. Jónsdóttur.
Heimildir
breyta- Baldur Hafstað. Árni Í Vík. Þættí úr sögu Árna J. Hafstað bónda í Vík. Skagfirðingabók 1985, bls. 7-56.
- Þorsteinn Jónsson. Hafstaðsætt, framætt og niðjatal Árna J. Hafstað og Ingibjargar Sigurðardóttur í Vík. Ættfræðirit nr. 1, 1978